ಮಾದಪ್ಪನ ಸಾವು – Madappana Saavu

ಕತೆಗಾರನ ಮಾತು

ಎದೆಯಲ್ಲಿ ಅಚ್ಚು ಮೂಡುವ, ಕಾಡುವ ಅನುಭವದ ಪ್ರಾಮಾಣಿಕ ತಿರುಳುಗಳನ್ನ ಒಂದು ಆಶಯದ ಮೂಲಕ ಹೇಳಿಕೊಳ್ಳಲು, ಅವುಗಳ ಹಲವು ಮಗ್ಗಲು, ಬಣ್ಣ, ರೂಪಗಳನ್ನು ತೆರೆದಿಟ್ಟು ನೋಡಲು ಆಪ್ತವಾಗುವ ಕಥೆ-ಕಥಾಲೋಕ ನನ್ನ ಬರೆಣಿಗೆಗೆ ಸೆಳೆದು ಕೊಂಡಿವೆ… ಬರೆದಷ್ಟೂ ಇನ್ನೂ ಬರೆಯಬೇಕೆಂಬ ಬರೆವಣಿಗೆಯ ಹಸಿವು ನನ್ನ ಬೆನ್ನು ಬಿದ್ದಿವೆ…

ಕತೆಗಳ ಹೆಗಲಮೇಲೆ ಕೈ ಹಾಕಿ ಒಂದೊಂದೇ ಹೆಜ್ಜೆ ಹಾಕುವ ದಿನಗಳಲ್ಲಿ ಮೂಡಿದ ಹೆಜ್ಜೆಗಳು ಹಲವಾರು… ಮಸುಕಾಗಿದ್ದರೂ, ಎಡವು-ತೊಡರುಗಳು ಕಂಡರೂ… ಈತನಕ ಕ್ರಮಿಸಿರುವೆನಲ್ಲ ಎಂಬ ತೃಪ್ತಿಯನ್ನ ಕಥಾಲೋಕ ನನಗೆ ತಂದಿದೆ.

ಅದೇ ಕಾರಣಕ್ಕೆ, ಆರಂಭದಲ್ಲಿ ಹಾಗೂ ಆ ದಿನಗಳ ನಂತರದಲ್ಲಿ ಬರೆದ ಕೆಲವು ಕತೆಗಳು ಬೆಳಕು ಕಾಣದೆ ಉಳಿಯದಿರಲೆಂದು, ಅವುಗಳಲ್ಲೊಂದಿಷ್ಟನ್ನ ಸಂಕಲಿಸಿ- ತಿದ್ದಿ-ತೀಡಿ ಪುಸ್ತಕ ರೂಪದಲ್ಲಿ ನಿಮ್ಮ ಮುಂದಿಡುತ್ತಿದ್ದೇನೆ.

ಇಲ್ಲಿಯ ಕತೆಗಳು ನನ್ನ ಮುಂದಿನ ಮಾರ್ಗಕ್ಕೆ ಒಂದು ಹಿನ್ನೆಲೆಯನ್ನೋ… ತಳಹದಿಯನ್ನೋ ನೀಡಿರಬಹುದೆಂಬ ನಂಬಿಕೆ ಮನದಲ್ಲೆಲ್ಲೋ ಒಂದಿಷ್ಟು ಉಳಿದಿರುವಿದರಿಂದ ಅವುಗಳ ಮೇಲಿನ ಪ್ರೀತಿ ಅವುಗಳನ್ನ ಪ್ರಕಟಿಸುವಂತೆ ಮಾಡಿದೆ… ಆದರದಿಂದ ಸ್ವೀಕರಿಸುತ್ತೀರೆಂಬ ವಿಶ್ವಾಸವೂ ಇದೆ.

ಕುಮಾರ ಬೇಂದ್ರೆ